മറവി

ഓർക്കണമെന്ന് പറഞ്ഞാൽ

നീയെന്നെ ഓർക്കുമോ?

അതോ ഏതോ ആൾക്കൂട്ടത്തിൽ

യാദൃശ്ചികമായി കണ്ട 

ഒരാളെയെന്നപോലെ..

ഏതോ മഴയിൽ ഒരിത്തിരി ദൂരം കുടപകുത്തൊരപരിചിതനെപ്പോലെ..

ദൂരയാത്രയിൽ ചാരേക്ക്

ക്ഷണിച്ച് ഇരിപ്പിടം നീട്ടിയ മുഖമോർക്കാത്ത ആ സഹയാത്രികനെപ്പോലെ..

ഒരു തീവണ്ടിയാത്രയിൽ

നിന്നെ മാത്രം നോക്കി കൈ വീശിയ ഏതോ ഒരു നിഷ്കളങ്കമായ 

ചിരിയെന്ന പോലെ..

യാത്രക്കിടയിൽ

തെല്ലിറങ്ങി വന്ന് വഴി ചോദിച്ച

ഓർത്തെടുക്കാനാവാത്ത

ആ ഒരു മനുഷ്യനെയെന്ന പോലെ

ഓർമ്മയുടെ ഒരിടത്തിലും

എത്ര ശ്രമിച്ചാലും

ഓർത്തെടുക്കാനാവാത്ത എല്ലാ മുഖങ്ങളെയും പോലെ

എന്നെയും നീ മറന്നേക്കുമോ?....